BİZİM FUTBOL

Azərbaycan millisi DÇ-2018-in seçmə mərhələsinin Avropa zonasında postsovet məkanının ən yaxşısıdı.Robert Prosineçkinin yetirmələri Rusiyada təşkil olunacaq mundiala UEFA zonasında yüksəlmək arzusunda olan MDB və Baltikyanı ölkələrin 10 yığması arasında ən yaxşı göstəriciyə malikdir/ Prosineçkinin yetirmələri postsovet məkanı təmsilçiləri arasında qol buraxmayan yeganə komanda olması ilə də fərqlənir. Digər komandalardan yalnız Litva bizimkilər kimi turnir cədvəlinin 2-ci pilləsində qərarlaşıb.Bu barədə "Futbolrevyu" informasiya-analitik nəşrində maraqlı material da dərc olunub. Nəşr yazır: "Keçmiş SSRİ yığmalarından ən yaxşı azərbaycanlılar start götürüblər. Qapısından heç bir qol keçirməyən Robert Prosineçkinin komandası almanlardan sonra ikinci yerdədir. Çexlərin inamlı görünmədikləri, Norveç və Şimali İrlandiya komandalarının o qədər də qorxulu olmadıqları nəzərə alınsa, azərbaycanlıları dünya birinciliyində görmək şansı əsla fantastik görünmür".

Keçmiş sovet respublikalarının 2018-ci ilin dünya çempionatının seçmə turnirinin final mərhələsinə keçmək şansının nəzərəçarpacaq dərəcədə azaldığını qeyd edən "Futbolrevyu"nun şərhçisi yazır: "Belarus yığması Hollandiyada darmadağın edilib, sonra da Lüksemburqa uduzub. Ermənistan yığması turnirdə ikinci və üçüncü dəfə də məğlubiyyətə uğrayıb. Moldova komandası da eyni vəziyyətdədir. Qazaxıstan yığmasının cəmi iki xalı var, Gürcüstan ondan da az - bir xal qazanıb. Latviya yığması öz meydanında Farer adaları komandasına uduzub. Estoniya yığması isə yalnız Cəbəllütariq komandası üçün qorxuludur. Ukrayna pis start götürməyib (iki heç-heçə və qələbə), amma komandada elə bir hərc-mərclik var ki. Litva yığması inamlı görünsə də, rəqib cəhətdən bəxti gətirməyib".