BİZİM FUTBOL

“Qarabağ”ın futbolçusu Ağabala Ramazanov “Neftçi” ilə oyunda maraqlı addımı ilə diqqət mərkəzinə düşüb. Bu hadisə oyunun 72-ci dəqiqəsində baş verib. Baş hakim Ramil Diniyevin “Neftçi”nin qapısına təyin etdiyi penalti qərarından sonra sevindiyindən emosiyalarını cilovlaya bilməyən Ağdam klubunun yeni transferi hakimi qucaqlayıb. Bu hərəkət heş də birmənalı qarşılanmayıb. O, sportnet.az-a verdiyi müsahibəsində bu məsələyə aydınlıq gətirməyə çalışıb.

"Qarabağ"ın futbolçusu Ağabala Ramazanovun müsahibəsi

- "Neftçi" ilə oyunda komandanızın lehinə təyin olunan penalti epizodunda baş hakim Ramil Diniyevi qucaqlamağınız geniş müzakirələrə səbəb olub. Bu hərəkətiniz penalti qərarına sevinməyinizdən irəli gəlirdi, yoxsa...

- Xeyr, bu, sadəcə, elə göründü. Əslində isə həmin vaxt məndən söz soruşurdu. Soruşurdu ki, həmin epizodda penalti var idimi?

- Sən nə cavab verdin?

- Mən də səs-küy olduğundan, qulağına dedim ki, bilmirəm. Bu da kənardan baxanlara sevincimdən referini qucaqlamağım kimi göründü.

- Baş hakimin futbolçuya belə bir sual verməsi normal haldır?

- Bilmirəm. Mən olanı deyirəm.

- Ümumiyyətlə, bugünkü hakimlik barədə nə düşünürsən?

- Məncə, Diniyev oyunu normal idarə etdi.

- Səncə, rəqib meydanında yerə yıxıldığınız vaxt penalti təyin etməməkdə haqlı idi?

- Bəli. Mənə sarı vərəqə göstərməkdə haqlı idi.

- Amma həmin vaxt qərara etiraz etdin...

- Əvvəlcə etiraz etsəm də, sonradan epizoda baxandan sonra doğru olduğunu gördüm.