DÜNYA FUTBOLU

IV İslam Həmrəyliyi Oyunlarının futbol yarışlarında ilk yarımfinalçılar müəyyənləşib. “AZAL Arena”da Oman millisi Əlcəzair yığması ilə qarşılaşıb. Moldovalı baş hakim Andrey Çebanın idarə etdiyi oyunun 40-cı dəqiqəsində Oman millisinin üzvü Muhsen Əl-Qassani hesabı açıb. Matçın 46-cı dəqiqəsində əlcəzairli Tayeb Mezaiani hesabı bərabərləşdirib. İkinci hissədə komandaların cəhdlərinə baxmayaraq hesab dəyişməyib və matç 1:1 hesablı heç-heçə ilə yekunlaşıb.

“Bayıl Arena”da təşkil olunan digər oyunda isə Türkiyə və Fələstin yığmaları üz-üzə gəliblər. Görüşə fəal başlayan Fələstin millisi oyunun 23-cü dəqiqəsində Oday Dabbaq, dörd dəqiqə sonra Mohammed Maraaba və 33-cü dəqiqədə İslam Batranın qolları hesabda önə çıxıb. Görüşün 44-cü dəqiqəsində türkiyəli futbolçu Can Hakki Aksu fərqlənib və oyunun birinci hissəsi Fələstin yığmasının 3:1 hesablı üstünlüyü ilə yekunlaşıb.

Matçın 63-cü dəqiqəsində Melih Okutan və 71-ci dəqiqəsində Taylan Antalyalı rəqib qapısına yol taparaq hesabı bərabərləşdiriblər. Qarşılaşmanın 81-ci dəqiqəsində Can Hakki Aksu dubl etməklə Türkiyə millisinin 4:3 hesablı qələbəsini rəsmiləşdirib.

Hesabında 7 xal olan Əlcəzair millisi “B” qrupunun lideri kimi yarımfinala vəsiqə qazanıb. Oman millisi (5 xal) qrup ikincisi kimi mərhələ adlayıb. Türkiyə 3 xalla üçüncü, Fələstin isə 1 xalla sonuncu pillədə qərarlaşıb.

B qrupu

Türkiyə – Fələstin - 4:3

Qollar: Hakkı Can Aksu, 44, 81; Melih Okutan, 63; Onur Eriş, 70 - Oday Əl Dabbaq, 22; Mohammed Maraaba, 29; İslam Batran, 33

Oman – Əlcəzair - 1:1

Qollar: Muhsin Əl Qassani, 40 - Tayeb Meziani, 45