"Neftçi” PFK-nın U-10 komandası Tbilisidə təşkil edilən SSRİ-nin əməkdar idman ustası Nodar Axalkatsinin xatirəsinə həsr olunmuş beynəlxalq turnirdə 4-cü yeri tutub. Qrup birincisi kimi 1/4 finala vəsiqə qazanmış komanda bu mərhələdə "Dinamo məktəbi”nə (U-10) 2:0 hesabı ilə qalib gəlib. Hər iki qolu Lorenzo Mezzotero vurub. Lakin yarımfinalda "Dinamo akademiyası” (U-10) səddi keçilməz olub – 0:3. "Neftçi” "Saburtalo” ilə 3-cü yer uğrunda qarşılaşmada 2:0 hesabı ilə irəlidə olsa da, sonda qələbəni əldən verib – 2:2. Təəssüf ki, oyunsonrası penalti seriyasında məğlub olan "Neftçi” PFK-nın U-10 komandası 4-cü yerlə kifayətlənməli olub.

Turnirdəki "Neftçi`nin digər təmsilçisi olan U-9 isə haqsızlığa uğrayıb. 1/4 final mərhələsində "Neftçi” (U-9) – "Dinamo məktəbi” (U-9) oyununun ilk hissəsindən (1:2) sonra rəqib klub bunadək U-10 komandamızda da oynamış futbolçu Lorenzo Mezzoteronun U-9-un formasını geyinməsinə etiraz edib. 2008-ci il təvəllüdlü, yəni 9 yaşlı futbolçunun həm U-10, həm də U-9 komandamızın heyətində meydana çıxmasının reqlamentə zidd olmadığını sübuta yetirsək də, rəqib komanda etirazından əl çəkməyib. Nəticədə "Neftçi” birinci hissədə qol vurmuş Lorenzo Mezzoteronun xidmətindən fasilədən sonra yararlana bilməyib. Bununla belə, Vüsal Kərimovun qolu sayəsində hesabı bərabərləşdirməyə nail olan komanda oyunsonrası penalti seriyasından qalib ayrılaraq, yarımfinala vəsiqə qazanıb. Lakin təşkilatçılar futbolçumuz Lorenzo Mezzoteronun ilk hissədə meydanda olduğunu əsas gətirərək, komandamıya texniki məğlubiyyət veriblər. Belə olduğu halda, "Neftçi” haqsızlığa etiraz əlaməti olaraq 5-ci yer uğrunda oyuna çıxmaqdan imtina edib.