Topaz Premyer Liqasında mövsümün sonuna 6 tur qalsa da, “Qarabağ”ın çempionluğu şübhə doğurmur. Qurban Qurbanovun yetirmələrini ardıcıl 5-ci çempionluqdan yalnız möcüzə məhrum edə bilər. 12 xal üstünlüyə malik Ağdam klubu qızıl medalları qazansa, Avropanın dəyişməz çempionları sırasına düşəcək. Söhbət ən azı son 5 çempionatda birinciliyi heç kimə güzəştə getməyən nəhənglərdən gedir. Təbii ki, komandaların öz ölkələrindəki nəhəngliyi nəzərdə tutulur. Hazırda Avropanın yalnız 9 ölkəsində eyni klub 5 və daha çox mövsümdə qızıl medal qazanıb. Bu siyahıya BATE başçılıq edir. 12 ildi Belarusun “1 nömrə”si olan Borisov klubu TNS və “Bazel”i 4 çempionluq qabaqlayır. Sonuncular gələn ay bitəcək İsveçrə çempionatında seriyasının qırılmasına üzülməyə yaxındı. Bununla, bazellilər siyahıdakı yerini itirəcək. TNS isə 8-ci zəfərini ötən ay bayram edib. Ümumiyyətlə, 5 və daha çox çempionluq seriyasına malik 9 komandadan ikisi – TNS və “Bavariya” cari mövsümdə qızıl medallara yiyələnib. Bu nəhənglərə qoşulmağa 5 namizəd var. Ardıcıl 4 çempionluğu olanlardan biri “Qarabağ”dısa, “Benfika” Portuqaliyada, “Zalsburq” Avstriyada, “Santa Koloma” Andorrada, “Astana” isə Qazaxıstanda “5”ə çata bilər. Sonuncular bunun üçün ilin sonunu gözləməlidi. Çünki orada yarış “yaz-payız” sistemi ilə keçirilir.
Avropa ölkələrində dəyişməz çempionlar
1. BATE (Belarus) - 12
2-3. “Bazel” (İsveçrə) – 8
TNS (Uels) – 8
4. “Olimpiakos” (Yunanıstan) – 7
5-8. “Seltik” (Şotlandiya) – 6
“Yuventus” (İtaliya) – 6
“Lüdoqorets” (Bolqarıstan) – 6
“Bavariya” (Almaniya) - 6
9. APOEL (Kipr) – 5
Apasport