çərşənbə, 18 sentyabr 2019

BİZİM FUTBOL

"Sumqayıt" klubu üzr istədi

02.09.2019 17:15 Oxundu 191

"Sumqayıt" futbol klubu “Neftçi” – “Sumqayıt” qarşılaşmasının son dəqiqələrində meydanda baş vermiş hadisələrə görə bəyanat yayıb.


Cempion.az klubun rəsmi saytına istinadən həmin bəyanatı sizə təqdim edir:

Hörmətli futbol ictimaiyyəti!

“Sumqayıt” Futbol Klubu olaraq, hər zaman ədalətli oyunun, qarşılıqlı hörmətin tərəfdarı olmuş, meydanda və meydandan kənarda şiddət və aqressiyanın yolverilməz olduğunu hesab etmişik. Azərbaycan Premyer Liqasının 3-cü turu çərçivəsində sentyabrın 1-də Bakı şəhərindəki “Bakcell Arena”da keçirilmiş “Neftçi” – “Sumqayıt” qarşılaşmasının son dəqiqələrində meydanda baş vermiş insidentə görə ölkə futbol ictimaiyyətindən “Sumqayıt” FK olaraq üzr istəyirik.

Bəyan edirik ki, AFFA-nın müvafiq strukturunun məlum olayla bağlı çıxaracağı qərardan savayı, klub daxilində də məsələ ilə bağlı detallı araşdırma aparılacaq və uyğun addımlar atılacaq. 

“Sumqayıt” FK futbolun bir idman növü olaraq hörmət və ehtiram (Respect) kimi təməl prinsiplər üzərində indiki inkişaf səviyyəsinə çatdığına və klubumuzun hər bir üzvü bu prinsiplərə hər zaman əməl olunmasının vacibliyinə inanır.

Bu bəyanatla bir daha ölkə futbolundakı bütün rəqiblərimizə ehtiramımızı ifadə edir, “Hər şey Azərbaycan futbolu üçün!”, - deyirik.

Qeyd edək ki, "Neftçi"-"Sumqayıt" oyununun uzatma dəqiqələrində "Neftçi"nin futbolçusu Stiven Jozef-Monrozun qolundan sonra meydanda iki komandanın üzvləri arasında toqquşma baş verib. Nəticədə "Neftçi"nin məşqçisi Etibar Tanrıverdiyev "Sumqayıt"ın baş məşqçisi Ayxan Abbasovu vurub. Eyni zamanda müdafiəçilər Anton Krivotsyukla Vurğun Hüseynov mübahisə edib. Referi hər iki oyunçunu meydandan qovub.
Xatırladaq ki, "Neftçi"-"Sumqayıt" matçı "flaqman"ın 2-1 hesablı qələbəsi ilə başa çatıb.