BİZİM FUTBOL

Azərbaycan Premyer Liqasının 12-ci turunun "Sumqayıt" - "Qarabağ" oyunundan (2:1) sonra Ağdam klubunun baş məşqçisi Qurban Qurbanovun mətbuat konfransı keçirilib. Cempion.az xəbər verir ki, Qurbanov əvvəlcə qarşılaşma haqqında fikirlərini bildirib:

"Ayxan Abbasovu təbrik edirəm. "Sumqayıt" son matçlara yaxşı oyun göstərir. Bu məğlubiyyəti gözləyirdim. Cari çempionatda ilk dəfə uduzduq".

47 yaşlı mütəxəssisin sözlərinə görə, heyətlə bağlı müəyyən problemlər var: "Futbolçuların üzərinə çox getməyəcəyəm. İki fərqli hissə oldu. Çox sadə epizodlarda top itkilərinə yol verdik. Halbuki daha soyuqqanlı olmalıydıq. Məğlubiyyəti qəbul etməliyik. Son vaxtlar tam istədiyimiz heyətlə oynaya bilmirik. Çox səbəblər axtarmaq istəmirəm. Futbolçuların fikirlərinin "Sevilya" ilə Avropa Liqasınının oyununda olduğunu düşünmürəm. Gördüm oyun da alınmır, çox da riskə getmədim. Əks halda Dani Kintananı da meydana buraxa bilərdim".

Qurbanovun bildirib ki, hər bir məğlibiyyət futbolçulara təsir edir: "Biz peşəkarıq. "Sevilya" ilə matça qədər düzgün işləməliyik. Səhvləri hər kəs özü analiz edəcək. Böyük komandayıqsa, belə məğlubiyyətləri tez yaddan çıxarmalıyıq".

Baş məşqçi oğlu Musa Qurbanlıya əsas komandada şans verməməsinə də toxunub: "Hər şeyin öz vaxtı var. Musadan əlavə də bizimlə daha çox məşq edən gənclərimiz var. "Qarabağ"da oynamaq elə də asan deyil. Gənclər daha da çox çalışmalıdırlar".