BİZİM FUTBOL

Bu gün 21 yaşlılardan ibarət milli komandamız (U-21) Avropa çempionatının seçmə mərhələsi çərçivəsində növbəti matçına çıxacaq. apasport-un məlumatına görə, AÇ-2017-nin final mərhələsinə yüksəlmək uğrunda son ev oyununu keçirəcək millimiz Farer adaları ilə qarşılaşacaq. Görüş gənclər millimiz üçün tarixində 91-ci sınaq olacaq. Baş məşqçi Yaşar Vahabzadə isə 12-ci dəfə bu komandanın sükanı arxasında meydana çıxacaq.

Hazırda 8 oyundan sonra 7 xalla qrupda 4-cü pillədə qərarlaşmış komandamız bu oyunla birlikdə bir çox tarixi nəticəyə imza ata bilər. Belə ki, qrupda bizim kimi 8 oyun keçirmiş, ancaq millimizdən fərqli olaraq xal üzünə həsrət qalmış farerliləri məğlub edəcəyimiz halda ilk dəfə bir tsikldə 3 qələbə qazanmış olacağıq. Hər halda səfərdə minimal hesabla üstələdəyimiz rəqibə qarşı doğma meydanda bunu etmək o qədər də imkansız deyil.

Üstəlik bu niyyətimiz baş tutsa, xal hesabında da rekordu yeniləyəcəyik. 22 illik tarixində ən çox 9 xal yığa bilmiş U-21 potensial qələbə sayəsində xalını 10-a çatdıraraq yeni sədd müəyyənləşdirəcək. Mümkün qalibiyyət nəticəsində qrupda sıralama baxımından irəli getmək imkanımız olmasa da, bizimlə paralel keçirilən oyunda Rusiyanın 3 xal qazanması halında ən azından onlardan geri düşməyəcəyik.

AÇ-2017, Seçmə mərhələ

7-ci qrup

6 sentyabr

18:00. Azərbaycan U-21 – Farer adaları U-21

Baş hakim: Dmitriu Muntean

Yan xətt hakimləri: Vitali Qorbatov, Vlad Lifsiu

Dördüncü hakim: Yuri Kovtun (hamısı Moldova)

Bakı, “Dalğa Arena”